Ćulićeva kuća

Mej općinun i plovanijun je Ćulićeva kuća. Ćulić je bil već star i pred krajen, oslabel, hodeć je nekako štopihal, vavek je z ust tanko pljuval, ni ča bilo stat mu blizu. 1927. al 1928. leta smo se va tu kuću preselili od Dirakoveh, se j’ bila mat štufala gledat va Halubje. Živeli smo na drugen pode. Starega Ćulića ni već bilo. Parona, ka je reditala kuću je živela va Zamete, nad Malonju, muž je bil tišljar, bil nan je neko leto poluštral mobiliju. Zdola, pod nami na prven pode je bivala Filomena Jelovica z Rudna, sestra Franića Rudnara, va fonde je držala butigu od manjativi. Je rad va butigu prihajal po zapolne Pepino Zvončić, ma je Filomena bila prevelik kus za njega, za sen ten ča je umel ćakulat i lepe štorije povedat. Malo je za ten pasalo, je zaprla butigu pa je šla nekamo ća, zgleda preko na Živicu, h Matuljan pa je tamo oprla butigu. Za njun su tu prišli bivat Frana Banica i Matić Tuhtan z malen Milovanon. Franu su zvali Banica aš je bila od Bani, pa su po njoj i Mateta zvali Matić Franin. Su pred Gradon pod velun lipun držali kažot na meste kade su danaska skalini za poć va samouslugu. Va kažote je bilo vrduri, žira, baškotini, bomboni, i drugo: češljići, grablji, šuštini, a po zime su prodavali jako dobar kisel kapuz. Frana je hojevala v Reku, pokle na Sušak i prinašala va kofe na hrpte va Grad. Tako je to saki dan šlo: Matić va kažote, Frana na peškarije, mići Milovan je va to vreme doma spal. Bi se zbudil, zval mater, malo bi plakal pa bi opeta zaspal. Frana bi prišla okol jedanajste uri, već od Belvedera se čulo:  “Ala, ribi, ribi…“ a grašćice su već prihajale čekat pul kažota da se Frana rasprti, Matić je već zinesal škanj s pezun i riba je brzo šla. Prnesla je sardelini, lokarad, ki put pišmoj al oslić, a bi se našlo i mrkači al sipice. To je bil posal: Jutro rano stat, poć hodeć na Sušak, i tamo prit rano dokle je ribi na peškarije, zet ribu pogodit se za precij tako da bi se va Grade moglo neč zaslužit, pa ala s punun kofun na hrte nazad va Grad nazgorun, prit prej polna da bi se riba prodala, a da niš ne ostane. Kad bi prišla je Matić imel već pripravno kafa, da popije kad se rasprti, da malo počine pa kad se riba proda poć doma videt ča dela ono otroče. Je Frana povedala da ga je puno puti našla kako sedi na kušine i plače, ona je rekla “kod jedan svečić“. Stat otroka i uredit ga, pripravit ča za obed, poć zapolne malo leć… I tako saki dan, samo ne kada je dažjevno, al jako mrzlo i kad je ušćap na nebe, ribi onda ni.

Pokle, neč pred rat, je te ženske, a mej njimi i Franu, prepejeval Frane Sroković od Jurčić na tavolace i z jenen konjon do kunfina va Zamete, i tamo ih je čekal dokle se vrnu: Kofi nutra na tavolac, ženske, sede okolo, “ala, gremo zdolun!“ na linije Ćikovići – Zamet i nazad.

Kažot su morali zapret kad se je na ten meste počel zidat palac za službeničku zadrugu va Šudrićeven vrte. Onda su Matić i Frana oprli butižicu va Diračićeven pul šterni. Ja, ma Frana je i dalje hodila s praznun kofun zdolun, a s punun sakramenski tekac zgorun va Grad, prit doma sa potna i mokra i zajeno prodavat ribi dokla se ne pokvare, posebe po lete. Milić je već hodil va školu, bil je narasal, matere je bilo malo lagje aš je mogal sam za sebe mislet.

Matić je bil proval prej tega, neč za ten kako su prišli va Ćulićevu kuću, poć malo po svete, nać dela, je po arte bil zidar. Tako je išćuć delo arival do Kragujevca, pametin da je otuda prnesal šljivovicu i dal nan pokusit. Pokle ni već nikamo šal, je bilo dosta posla i doma.

S te kuće san moral poć va Petrinju va školu aš se Učiteljska škola va Grade bila zaprla. To je za moji doma bilo teže nego do sada, za me su morali stavit na stran baren 800 dinari, a otac je imel plaću 1.600 dinari. Za sreću se drugo leto 1930. leta ponovo oprla škola va Grade, pokle velega truda Vjekoslava Spinčića da se ta škola va Grade održi. Milić Franin je pak pokle šal va gimnaziju va Senj, a za raton je finil za inženjera za delat brodi i za ten cel život delal na doke v Reke. Koliko je brodi šlo vanka to on najboje zna.