Jurinčevi

Sad pridemo va kuću Jurinčeveh. Kod i Vicićeva i ova je na tri podi, na saken jena kamara, a kuhinja i jedna kamarica nad nju su dozidane na strane kontra Pelinon. Tu je h Pelinon bil kortil i s kraja zidana štala za kravu, a pod krovon za seno. Prasca su držali pod kondoton ki j´bil na mićehnen tarace do kuhinji. Va mićoj kamarice nad kuhinjun je spal moj otac Bruno kad bi prihajal, kod školan, doma z Kopra, i pokle kad je bil učitelj po Bodulije. Va ta kortil se prihajalo spod Frankine kući skroz jenu konobu tako, da su Jurinčevi imeli glavni portun kontra lože, a drugi portun za poć va kortil. Se je povedalo da su svojni Grajani i Vanjšćaki, a to su bili si oni ki su živeli zvanka graskeh zidin, bili vavek va barufe. Jedan od Jurinčeveh je to koristil da mu vavek bude dobro: kad su Grajani bili jači je hodil vanka na portun va Pelini, a kad su bili Vanjšćaki veća forca, onda bi šal vanka skroz portun kontra lože.

Va svoje vreme dokle su bili živi moj nono Zvanić i nona Roža, ka je bila od Diračićeveh, je to bila premožna familija ka je imela dosta grunta i lep vrt va Pelineh. Koliko su mi stareji ljudi povedali su Jurinčevi imeli lehi nad Brnini, ne znan jušto na ken meste, pak na Dno Klanac negde, pa pod Forticun, a najlepši je bil vrt va Pelineh, ki je sad Nevenku Baničiću, a kupil ga je Andre Baničić od barbi mojga Mirota. Se je povedalo: kad su Jurinčevi mlatili šenicu se je to delalo pod ložun, a vino se na kabli nosilo z konobi. Va toj konobe ga je vavek bilo ča će reć da su imeli dosta ruž, a za čuvat kravu je trebalo neč pokosit al požet, moralo je bit negde senožet. Ja, ma ja, zadnji od Jurinčeveh, nemoren reć koliko je tega bilo i kade – ne znan…

Zvanić Jurinčev (Ivan Jurinčić) je po arte bil postolar, zgleda da je to bil i nono mojga oca, otac Zvanićev, ma su oni bili kot neč cehmajstori za si postolari va Grade, aš i sad iman dokumenat va ken piše da iman svoj parat na Žudike – “koja se sastoji od 18/84 dijela k.č.br.40: trošna zgrada sa cisternom „ – kuće – skadnja zdavna ni, ma šterna je i danas na Žudike. Bi se moglo reć da su Jurinčevi imeli neč manje od petega dela skadnja i šterni na Žudike, kade se za si postolari va Grade pajsalo (od nemškega “beissen“ ča će reć grist) strojilo kožu za delat postoli. Od te besedi pride i ono „grajani – pajsari“, a pokle se šlo dalje: Dukići – repari, Spinčići  su tići, Rubeši su kurbeši – važno je da se rimuje. Ta preknono je bil neki od drugeh brat, ni bil Josip, za kega mi je otac povedal da je bil škrivan pul zadnjega gospodara kastavske gospoštije grofa Thierry-a, ki j´zgorel su arkivu od ranejeh, stareh vremen.

Po nekoj tradicije, va toj familije, je moj nono na Veli petak kantal, z drugemi Grajani, muku Isusovu, a to ni mogal ki je je sedet va kanoničkeh klupah i kantat, „Puče moj, puče…“ po čen se vidi da je to svojni bila štimana familija.

Nono je po temperamente bil da se jako brzo razjadi i bi onda zmeral,  je kemu pravo al ni. Takov je bil i z sini: bi ih pozval va konobu, napunil bi bukaletu dobrega vina, su tako sedeli i pili, nazdravjali. Povedal je moj otac: san nazdravil: „Zdravi bili, veseli“ a nono je čul kot da je rekal: „Zdravi bili, viseli!“, je skočil i mojmu ocu: „Ti si tovar! Si ste vi tovari! Vanka!“ – nono ni klel ni proklinjal, najviše ča bi rekal je bilo: „Corpo de Dio!“ ma su Grajani to nekako čuli kod da j´rekal: Corpo de bio! pa su ga tako, ma da ne čuje, zvali Korpodebijo. Pametin kod mići kad je h nan va Petrićevu kuću prihajal, najveć po zime zapolne. Bi sel pul šparheta i ta hip zakimal, kimal je ma je poslušal se ča se okol njega govori, pa ako bi ki ča rekal da se njemu ni pijažalo su leteli tovari po kuhinje, kod da je doma. Mane ni nikada kod vnučića pogladil al potehtal, nikad na kolena posel, nikad oreh al lešnjaki prnesal – za me je boji nono bil Ližijo Štrakotov al Andre Zvonov. Nono Zvanić je bil pomalo i avar: Mu je Andrić Jurjeničin jenega mladega leta ruže rezal. Znalo se: kad se ruže režu se pije najboje vino, ne ča je je. O rušnje je Zvanić prnesal barilcu i kad su ručili za ten su pili. Andrić je nagnul barilcu, ma ju j´brzo znel z ust, dal je Zvaniću i rekal: „Zvanić, ja ruže režen…“ „Ja, ja, vidin…“. Pasala j´rušnja, Andrić je opet počel rezat ruže. Zvanić mu j´prinesal barilcu: „Na, popij malo…“  „Zvanić, ja ruže režen…“ „Ja, ja vidin…“ Andrić ni niš već rekal, hitil mu mac žukvi pod nogi, stavil kosericu za pas i šal doma. „Ča je, kamo greš?“ za njen pita Zvanić. Andrić se ni ni obrnul. Zač tako? Zvanić je imel dobrega vina, ma je va barilcu nalel bivandu, a to je za Andrića bila ofenda, aš se za njega znalo da najboje ume ruže rezat.

Otac moj je užal govorit: “Ne znan ča je ovemu mojemu ocu, ni jena mu nevesta ni dobra“. A tako je i bilo aš su se i Bruno i Miro oženili, ma oca nisu pitali mu se pijaža ta ku te zet, a on je mislel da prez njegove besedi ne more niš bit. Mat moja Mila mu ni bila dobra, ki zna zač, Mima Mirotova isto tako. Proval je barba Miro da te z Mimun pul njega bivat va kuće, prigledat ga, ja ma to je duralo ki mesec, neč Zvaniću ni bilo po njegoven, ala vanka z moje kuće! Zato moj otac z materun ni nikad otel ni provat poć skupa z nonoton bivat va kuće, boje mu je bilo fit plaćat i bit va mire z nami skupa. I tako je Zvanić Jurinčev ostarel, počel je bolovat, smo ga obahajali, duhtora zvali, Dabović je vrtel z glavun, ni mu se pijažalo stanje nonota i tako je sam va kuće finil negde pred kraj prvega rata. Sprogod pametin: kaselu su na rameneh nosili najprej va velu crekav na katafalk, tri popi su čitali molitvi, onda su ga opet na rameneh nosili po Grade zdolun va sv. Luciju i zakopali. Starega grajana nosili su zadnji put stari grajani. Nijenega zaten nisu nikada tako nosili, na rameneh.

Va kuću je prišal Miro (Vladimir) z ženun Mimun ka je bila od Šćitaroveh i tako se kod neoženjena pisala. Već su imeli sina Tončića (Anton) ko leto mlajega od mane, pametin da san ga za ruku pejal kad je bil sprogod nonotu. Ma je počelo sad nopak: Miro je po nekakoven austrijsken zakone redital se Jurinčevo s ten da ni dužan, za očevun smrtun, niš braton dat kod njihi deli od očevine, aš se računalo da su moj otac Bruno i njegov brat Francik (Franjo), ki je bil pop v Istroj, već potrošili ča su se školovali. Četrti brat Mile je 1909. leta umrl va Stenjevce va duševnoj bolnice, a bil je po arte tišljar, njega Miro ni računal kad ga ni. To je tako ostalo se dokle nisu 1921. leta nas oslobodili od talijanske okupacije, pa su zakoni promenjeni kako je to bilo va tadanjoj države SHS. Otac i Francik su se dogovorili z Miroton da njin isplati po 10000 dinari, kod njih del od očevini, da ne bi šli na sud, aš je onda bilo: “Ča j´to brati rojeni, a gredu pred sud?“. A ta pogodba je bila kod naručena za mojga barbu Mirota, je sad bil liber delat z Jurinčevenun imovinun ča ga je bilo volja. Kako ga je pijažalo pit, a plaća općinskega škrivana ni bila ki zna ča, treba reć da je kod škrivan na općine bil vredan i pedantan samo kad je bil trezan, to je počelo pomalo, pa se više prodavat ono ča su stari, zajedno z Zvanićen na kraje, priskrbeli i imeli. Pomalo, pomalo pa je se, od dosta velikega imanja, šlo. Se j´povedalo da je na kraje, kad je zadnji kus prodal, sudac rekal: „Gospodin Jurinčić, sad van je lahko – nimate već niš. “ Za ten je ostal živet od škrivanske plaći.

Mima se je doma, pul Jurinčeveh, mučila prit vanka i dat Tončiću ča bojega pojist, aš je rasal, Miro je saki dan prihajal šviknjen, al pijan, bi doma zijal i sakramental, ki zna za ča.

Užal je pijan prit pod poneštru od kuhinji pul Petrićeveh, pa bi mojoj matere zmeral sega i sačesa ča mu j´prišlo na pamet. Z općini ga je glavar nekoliko puti stiral s posla, a onda bi Miro prišal h nan i bi prosil mojga oca, svojga brata da pogovori z glavaron da ga nazad primu na posal. Glavar Mate Cucančić je bil dobar prijatel z mojen ocen pa bi mu storil po volje. I tako  moj barba Miro z sirotun Mimun i z Tončićen prehićeval se od meseca do meseca, počel je za pijaču i dugi delat, ako mu je ki dal ča na puf. Kad je Tončić narasal je se šal vadit za fotografa pul Matulj, je mu šlo od ruki va ten posle, računal se više kod artišta va svojen posle. Počel je nosit vlasi dugi do ramena, pa su ga njegovi kumpanji zvali Tončić Gundulić, aš je bil spodoban temu poete. Kad san šal od domi ća je Tončić već zasluževal dobro, pa je tako mogal doma pomoć.

Neč bi reć za najstarejega brata mojga oca, popa Francika (Franjo) Jurinčića, ki je služil po Istroj, ostal je tamo i pokle ča se j´Kastavšćina, manji del, oslobodila, se dokle ga nisu fašisti, negde 1925. al 1926. leta naleli ričinusa, za ten je od straha, da takova operacija ne bude još ki put, prešal semo i je dobil za popa va kaznione va Sremskoj Mitrovice. Tamo ga je čekal drugi oganj od komunist ki su tamo bili zaprti, a on, kod pop, ni mogal jako ča pomoć da ih privoli na svoju stran, da ne budu kontra Bogu. Tamo je zgleda i finil.

Najmlaji brat mojga oca Milan je bil jako dobar tišljar, je mojoj matere kod svojoj kunjade bil storil jedan lep stolčić za štikat, i po ten ga je vavek spominjala, aš je, brižan, finil va Stenjevce. Ni bil oženjen i za njen ni ni jedan ostal.

Tončić je pred kraj ovega, pasanega rata, umrl od posledic z borbi, pa su Miro i Mima bili va staračken dome va Lovrane i neč va Bakre. Tamo su jedan za drugen finili.

Na kraje san ja, kod zadnji od Jurinčeveh, redital starinu pul loži va Grade, jako rovinanu i nepopravnu let i let, pomalo je neč popravljal fitoval Ive Pavlović dokle ni storil svoju kuću pul Brnin. Ja san već bil osigural stan ovde, va Beograde, za popravit tu starinu ni se moglo nabrat beči ni otkuda, pa je to zela Mesna zajednica va Grade, koj san kuću prodal. Ona štala zad kućun h Pelinon bila je već mirina za niš.

Tako gredu jena za drugun graske familije. Jurinčevi te se pozabit kod ča su već pozabljeni Frankini, keh danas zovu Picići, a to neće dugo durat aš i teh Picići već ni.