Jurinčićevi

Na kraje se pride do vele kući, to su zapravo dve, jena je kade žive Riko Jurinčić, postolar z ženun i dvoje dece, zovu ih Jurinčićevi. Mej temi dvemi kućami, druga je Tancabelova, su pasaji kod nekako pomešani i ki prvi put pride tamo bi mogal pogrešit. Obedve kuće su na dva poda, a va ovoj, Jurinčićevoj, je Riko imel svoju postolariju na drugen pode, al nekako h Tancabeloven, a bival je va dele kući ka se po njen zvala. Riko je imel brata ki se zval Ciro, ma su ga po Grade zvali Ciro Broka, aš je svojni delal na doke i držal kontra kad su brukali lamarini na brodeh, on se na to ime jadil. Ni bil oženjen, malo je bil kod da ni jušto na ešere, se je družil z Franićen Fružun, obadva su bili dobri kod manavli, a su po Grade i drva pilili. Riko je pak kod mladić bil jako dobar va Sokole i va „Istarskoj vile“, je ga videt na slikah s tega vremena.