Kuća Dali Srdočeve

Od Pećaričineh obrnut na desno gre kalica na Lokvu. Tu je bila kućica Dali Srdočeve, a i pisala se Srdoč, sestri Franeta Amerikana, podugasta kućica z skodon pred vrati. Mića kuća, miće poneštrice, mići skod i tu je živela mića Dalica. Na skode su po nedeje zapolne, kad je lepo vreme, igrali na tombolu: Ambo, terno, kvaderno…. i tako celo zapolne dokle ne zaškuri, pa poć doma: neki je neč dobil, neki ni , ma je z gušton pasalo zapolne. Dalica je jako rada bila kad bimo njoj maškarani prišli va kuću, vavek se j’ našlo ko jaje za dat maškaran.

Pul nje je bival Nando Srdoč, Račanićev zet, dokle je hodil va Učiteljsku školu va Grade. Bil njoj je nekakov rod.