Kuća Viceta Puharića (zrušena kuća)

Od ove kući na kraje, kontra Ulijane je svojni bila manja kuća na pod va koj je bival Vice Puharić z ženun Katetun. Ja ga pametin kod starega čoveka ki je h nan prihajal va Nazorovu kuću pilit drva za zimu, a Kate je bila nekada devica pul Šundrićeveh v oštarije otuda se i oženila za Viceta govoreć kako je rada bit va jenen kraje. Ča je Vice bil po arte ne znan, nisan ga nikada videl ča delat, samo ča nan je drva pilil – ma kakovo je to delo. On ni pital koliko će mu se za finjen posal platit, za njega je bilo samo dat mu ki paket tabaka, onda je bil va deveten nebe, aš je rad pušil. Kate ni mu mogla kupovat tabaka od svojeh žurnad keh je pul ljudi z grunton, al z vrton delala, ne onoliko koliko je Vice, ki ni niš delal, sedeć pul šparheta al pred vrati, mogal popušit. Za oven raton ni bilo ki reditat tu dosta staru kuću, ka je počela se rušit, a Vice i Kate su već bili va sv. Lucije, pa se je neki pametan spametil i rekal da se kuća zruši, a zrušit je lagje nego storit. Na meste te kući je sad prazno, vide se samo fundamenti.