Lukovi

Pod ložun pa malo nutar je na same bila vela kuća va koj je živela Pepina Lukova, pa su ih zvali Lukovi. Hćer Marija je bila doma, lepo je umela šit, druga pak hćer Smiljka je hodila na Sušak va trgovačku školu, ku je i finila, ma san ja već bil ća. Sin Nando je va lečilište Šumetlice bil ekonom al knjigovođa, bi prišal ki put doma, ma baš po lete ni prihajal. Kad još Smiljka ni bila finila školu na Sušake su se tamo preselile mat z obemi hćerami, je mejtentega umrla i nona, mat Pepina ka je živela va stane pod krovon, pa su se ko leto pred drugi rat si skupa preselili va Zagreb, samo je Smiljka ostala na Sušake kade se je oženila. Va njih stan je prišal Hofman, zubar z ženun i sini Nereon i Julijen.
Va drugen stane va istoj kuće je dugo let živel Vilko Sever, upravitelj Delavske školi, z ženun i sinon Bogdanon. Žena mu je bila od Spinčić, neputa od Vjekoslava Spinčića. Tu, h njin je prihajal Vjekoslav, kad bi s kuda prišal doma, malo obać starinu i Grad. Bogdan je s manun ko leto vadil va građanskoj škole, neč II al III razred pokle su šli nekamo ća, bi reć na Sušak, kade je njegov otac postal direktor stručne školi, a na njegovo mesto va Grade je sel Riko (Hinko) Jelušić – Ritina, moj barba od materi. To se je promenjevalo okol 1928. leta.