Pećaričini

Poć zdolun po kontrade drži se za Picigerovu kuću, kuća Pećaričineh. Ime govori ča se j’ tu delalo, ma svojni, za vreme ko ja zapisujen ni peknjica pekla kruh ni ča drugo. Tu su živeli Frane Pećaričin, tako su ga zvali a ne Dirakov ni Picigera, aš je bil zet va kuće, i š njen njegova hćer Ida. Po lete bi ki put prihajal sin Francik, skupa z ženun i dve malice, on je bil makiništa na brodeh, ma na Save i Dunave, a živeli su va Beograde. Frane je prijimal nekakov penžion, je svojni delal na fundarije, v Reke. Kako san već rekal je prihajal pomoć bratu Pepiću storit i zabrukat obruči i drugo teže delo okol okruti, ča Pepić sam već ni mogal, aš se Frane razumel i va ta posal – bačvariju. Po nedeje, za ranun mašun, bi šli Pepić i Frane čut klic, poslušat ča je oglašal fant Jovanin, bi postali Predgradon, poćakulali s ken morda je ki ča i naručil od okruti storit, pa poć doma. Zapolne za četrtun urun bi skupa šli Brkotoven, ki kvartin popit, gledat kako boćaju, pa tako do osme, devete uri i poć doma, nazgorun pul Gauša i va Pelini doma. Pepića bi ćapalo ono ča j’ popil, Frane ga je pridrževal. Pul Marineh bi Frane zakantal: „Ne boj mi se, divojcice….“ Pepić ga je proval kumpanjat, ma slabo i pesan je brzo utihnula.

Tako je onda vreme pasevalo: sakidajni dan na delo a po nedeje divertiment……divertiment?