Picigerovi – Dirakovi

Pod ovun kućun poć malo zdolun pridu Dirakovi al Picigerovi. To je vela kuća, za pravo reć to su dve kući a jedan prihod z voltami i kolonami, pred vrati šterna. Tu je va većoj kuće živel Pepić (Josip Baćić) Picigera, reje se reklo Dirakov, dovac, a po arte bačvar. Kad ga ja pametin je bil već star, ma je sejeno delal i po zime, ne preveć, ma je delal svoj art. Prej neg ča smo se mi, otac, mat i ja, preselili h njin na prvi pod, već su va kuće bili Frane i Kate Grbac, su govorili Frane Zvonećan, ma su po praven prišli z Krive starega Pepića prigledat i va kuće ostat za reditat. Su imeli decu: Stanko je bil najstareji, je imel nekako podugastu glavu pa smo ga zvali Pinka, Marica za njen, pak Josip ki je sad doma i Vinko ki žive v Reke. Ovi dva zadnji su bili mićihni kad san ja va toj kuće živel, pametin da san Josipu bil storil kod bicikletu, se od drva, pa se j’ po oneh koguladah nekako na ten i pejal. Frane i Kate su delali grunat, moralo je neč negde bit, aš su saku zimu zgojili prasca. Od njih smo bili jene zimi kupili pršut.

Pepić je bil bačvar i to od oneh ki su od početka do kraja okruta se delali. Je po lete delal pod voltun, spod prihoda va kuću, spamećujen se kako mu j’ šlo od ruki cepat dugi od grmovini, niš ni bilo za ća hitit. To se pokle sušilo složeno na križ pred voltun dokle mu pride vreme za obdelevat. Ti grmi su sekli va Čabrence, kade su imeli umejak. Dugi je obdeleval po, širine sedeć na bačvarsken stole, kemu je glava pretiskala i držala dugu, a Pepić je z nožcen obdeleval dugu dokle to rabi. Pokle su se dugi obreževale na struge, to je kodabi jena duga blanja ka stoji na dveh nožicah a druga stran na zemlje, tako da čovek na ten struge dela stojeć, a dugi se na ten obrezuju po stranah, malo na treso, a va srede neč šire neg po krajeh. Kad je i to gotovo se dugi slože va obruči, ki su od železne šini, ma se obruči ne nabiju nego samo koliko da drže dugi složene, pa se nutra va ten stori oganj, da va sred dužini dugi malo nagore, obruči se pomalo nabijaju, a dugi se zvijaju kako to za okut rabi. Tako se priprave i delaju dugi za bačvasti okruti, a za drugi ne treba dugi goret, nego se slože drite: za čabri, kabli, leji, brenti i još ča drugo, ča ima drite dugi. Oganj je gorel va jenen kod koše od železne rašteladi da se ne bi rasul i preveć zgorel dugi. Kad bačvar vidi da su se dugi zvile kod ča rabi, zname napol storen okrut ća, a stavi složene dugi za drugi okrut da nagore, to koliko je naručeno za storit. Koliko će se dug stavit za jedan okrut to se znalo z praksi. Kad se složene dugi z nabijenemi obruči ohlade, se obruči još dobro nabiju, da dugi jušto zapru. Da bi to bilo ča boje, da okrut ne pušća, se je obruči malo molevalo pa bi se mej dugi stavljalo duge uske pera od neke travi, ka raste pul vodi (šaš?), onda bi se opet obruči nabili, pak se s pilun zdricali kraji dug da nijena ne štrči. Sad pride na red skrojit dna. Bi se najpre zmerilo koliko je od jene na drugu stran na dne pa se još malo pustilo i to je bila mera za dno (3,14). Z velen drvenen šestilon se je pokle senjalo tondo dno, a mera je bila malo više od pol onega ča je izmereno od jene na drugu stran dug. Dno se delalo od driteh dug, jako mej sobun zjuštaneh, a mej sobun ćapaneh z kavijami. Kavije su bile kot paličice od drenovini, kod nekakovi veli štikadenti, s kemi se fermale dugi za dno zabijene va zjuštane škuji med dugami. Da ne bi pušćalo se je strani dug malo namazalo z retken teston. Sad se z napošnen oruden stori utora na obadveh dneh, va ku će se inkasat obadva dna, pa se za ten obdelaju dna z nožcen na stole. Okole po dneh se zname ća z obedve strani na treso tako da obod dna lepo legne va utoru. Ta posal se ni nikad finil od prve, leh se molevalo obruči okol dna nekoliko puti, provalo se inkasevat dno, i kad bi bačvar videl da je se zjuštano, pomalo bi rinul dna va utori, jeno pa drugo. Ma prej tega je obdelal okrut znutri z napošnen oruden, kod mićihan tondi nožac ki se držal z jenun rukun. To se obdelevalo dokle god z nutri ne bude se lepo i lišo. Sad je bilo se gotovo za okrut složit, obruči dobro nabit da forca drže, još ča god zvani obdelat po dne i po dugah da bude lišo, na jenoj duge va sredine zvrtat veću škuju za čep – tapun, a na jenoj strane dna škuju za špinu. Da lepše zgleda bi se na kraje popituralo obruči črjeno. Treba reć da su ovi bačvari imeli i nakovalo na ken su tondali i brukali obruči i malo jenu stran po obode kovali tako obruč legne na treso na okrut, da bi se mogal nabijat. Pepiću je njegov brat Frane Pećaričin vavek prihajal skrojit obruči i zabrukat, Frane ni bil bačvar ma se je va taj art puno razumel.

Pepiću su ženske prinašale čabri i kabli za popravit. Trebalo je negde fondo promenit, negde dugu promenit, negde skratit okrut po visine, aš se pojila utora, ni ča imelo držat dno. Se je to Pepić finjeval, pa bi pokle stavil okrut malo va škalnicu pod Marinovun kućun da se nabumba, posebe, po lete kad su okruti brzo rasuševali.

Bačvari su imeli jenu, okol metar, dugu, kvadratu palicu ka je rabila za zmerit koliko će se litar moć va okrut nalet. Ta je palica imela senjali narezani za meru ka rabi, za saku sortu okruta ki je bačvast: za baril oko 30 litar, ma su barili slabo delali, to je nekada rabilo za vodu nosit, od Zvira, Rečini kad bi bile vele suši i nestala bi voda po šternah, pak mera za karatel oko 42 litri, pokle za bačvice okol 70 litar, a veće od tega su već bile bačve od 100 do 120 litar. Veći pak okruti, bačvi od 200 do 500 litar su delali bačvari pul Trinajstić i to za Dalmaciju, ma od mehkega dreva i z obruči od jasena. Oni nisu dugi već goreli nego su ih prej slaganja kuhali va napošneh kotleh.

Će se reć kako da san se to po rede zapametil kako i ča bačvari delaju. Tamo san va njihoj kuće bival i po lete san po cel dan pul njih sedel, gledal kako delaju i bin pital za ovo al za ono, samo san ja više sedel pul Vikota Dirakovega, nisu ga zvali Picigera, najmlajega od brat Dirakoveh, srednjega smo već spomenuli da su ga zvali Frane Pećaričin, po žene koj je va kuće bil zet. Viko ni imel voltu za delo, je delal va konobe pul oprteh vrat kade se dobro vidi. Se ovo ča san napisal mi je on umel lepo i razložno povedet i špjegat, ne samo: to ti je ovako, to onako – nego i zač je ča tako al ovako. Se ča je delal je delal pedantno, se je moralo bit zjuštano, zdricano, lišo, da ne pušća. Jako je na to pazil. Ja san mu pomogal koliko san mogal, a to je navajno bilo obrnjat veli brus kad je rabilo ča od oruda nabrusit. Kad bi oćutil da san se obrnjajuć težak brus, strudil, bi rekal: „Sad je dobro!“  za sen ča ni bilo nabrušeno, bimo malo seli i pokle dobrusili kako rabi. Vavek je govoril: „Orude mora bit oštro, a ti moraš pazit da se ne porežeš!“ Va konobe je pored stola i struga imel va jenen kantune i žrva, na keh su prihajale mlet frmentu, reje šenicu, ženske, susedi. Tu je koliko z rukun dosegnut, bil storen kod pod za tamo stavit okruti ki su bili finjeni al opravni. Me je navadil delat z nožcen, dricat na struge, na jenen staren okrute, ki ni bil za niš, san navadil storit utoru. Viko je se to povedal po tiho, ni bil žverglav kod ča su artižani kad njin takneš čagod od oruda, „Ala još malo pa će bit dobro“ i na takov mod. Po ten ću ga vavek pametit. Viko je z ženun Cilun bival va manjen dele kući. Nisu imeli dece a zlobne grašćice su govorile da je to zato ča Viko nima brk, pa nima ni otrok. Je bil prez brk i ni mu rasla brada, a kad bi ga ki za to kojonal, grdo bi se razjadil i bi hitil va tega ča mu se prvo našlo v rukah. Ta ki bi ga tel štucigat bi stal zad kantunon Marinine kući i bi zazijal: „Viko!“ „Ča je? Ki me to zove?“ bi se čulo s konobi „Viko, hote brzo, brijač vas čeka!“ pa zajeno nekamo ća brzo pobeć, aš je Vikotovo orude bilo jako oštro. Kad bi tako jadnemu prišla na vrata ka ženska: „Viko, ca delate? Je ca dela?“ Viko bi zazijal: „Kurac, jebenti anjele“. To je bilo najviše ča bi zaklel kad bi se razjadil.

Nisu mogli ki zna kako živet. Viko je delal ma najviše su to bile popravki na okruteh ke bi ženske prinašale, a to su bili kabli, čabri za prat i ča drugo od mehkega dreva, kupljeno na samje, a to ni Viko rad delal aš je bilo sakako storeno. Cila njegova, ku je zval Cilka, je po Grade nosila po kućah vodu va brente, neč bi i s ten zaslužila i tako su se nekako prehićevali. Su još zad kućun imeli lep vrt s puno žira, cibore i nekakovo ronklo. Cila je tu sadila sakakovu vrduru i s ten su se neč mogli va kuće pomoć.

Pepić je va kuće imel neč knjig keh je kupoval i čital. Tako mi je od njega ostala „Korabljica“ pisma od svetega Kačića Miošića, štampana va Zadre negde 1863. leta, a na njoj se potpisal Giuseppe Bacich.

Neč treba zapisat z tega vremena, a ča je jako pogodilo naši ljudi. Kad je već Austrija umirala je štampala šoldi, kruni, ke su i va to vreme jako slabo vredile, ma su ih ljudi čuvali – šoldi su šoldi! Talijani nisu za vreme okupacije promenjevali te kruni va liri, promenjevalo se pokle kad je bila SHS, za 1921. leton. To se promenjevalo na općine, a ljudi su prinašali te kruni va boršah, celi maci, ma se nisu se te kruni mogle promenit, aš je bilo i takoveh ke nisu niš vajale. Ljudi bi seli na općinske skala, bi stavili te kruni preda se pa bi nad njimi kleli i proklinjali – ki zna koliko su dela storili, ki zna ki strah pretrpeli delajuć kontrabandu za to zaslužit – a sad ne vaja niš. A Frane Grbac, kega su zvali zet Pepića Picigeri, je pak te nevajale kruni posložil i stavil va kvadri i obesil to kod sliki va kamare, kade su on, Kate i deca spali. To ga je spamećevalo na delo, ko j’ svojni storil kemu, a ta trud i muka su bili plaćeni z šoldi ki niš ne vajaju, delal je za niš! Računan da su to bile sliki va kvadreh kakoveh ni nikada nijedan obesil na zid va svojoj kamare. Frane je!