Štrkovi

Po skalineh kuda se šlo nekada Puharićeven se gre i va kuću Štrkoveh, stare graske familiji. Tu je živela nona Nadala, sestra moje noni po matere Marije, pisala se je Jelušić, pa je bil njiji sin Tončić (Anton) i nevesta Milka od Rikotoveh. Imeli su dva sina Vojmira i Velimira – Velju.  Velja se je bil ponesrećil v Reke – je zaletel pod tramvaj z bicikletun i od posledic je finil, a njegov sin je danaska zet va kuće pul Stipića, klesara pul Spinčić. Milka je cel svoj život šila i držala tri kantuni od kući. Vojmir je priznaval da ni bilo nje ni on ni Velja ne bi bili ča su postali. Tončić je bil lugar po gorah negde, retko je doma prihajal, morda o puste al za kakov blagdan, a tamo su zgleda ostajali i beči keh je kod plaću prijimal. Vojmir je kašneje govoril da je puno bilo ako mu je mat, kod već naraslemu školanu, mogla po nedeje dat 10 dinari za kamo poć se divertit, ako se za ti šoldi moglo čagod od divertimana oćutit. Kad je Vojmir finil za učitelja je dobil mesto va Staroj Baške na Krke, a pokle još negde po Bodulije da bi na kraje prišal va Grad za dugo let. Je povedal da su mu Basćani govorili kako pul njih ima „cagod će, lepu vistu i kajić kadgod će“, a Stara Baška je kod otsečena od ostalega dela Krka. Oženjen je bil za Bosiljku Turčinovićevu, na pire njin je sopal Kazimir Turčićev va armuniku. Sini Vojmirovi su već narasli, saki je već svoj čovek, a Vojmir je prerano finil i šal od kuda se ne vrne nijedan. Doma žive dovica va Koširovoj kuće.