Ulijanina kuća

Pod samen turnon je kuća Ulijanina. Tu je živela mat Ulija i hćer Anica, ako se ne varan, su se pisale Grbac. Anica je bila jako slabahna i tanka, ma se sejeno va nju bil zagledal jedan fanjski graničar, samo se ni moglo niš storit aš je graničar već bil oženjen, pa kad su njegovi, va komande, čuli ča j’to š njen, su ga premestili nekamo ća. Zgleda da su mat i hćer nekako živele od prihoda z grunta, a držale su na fite i školani.

Kad san bil va I razrede Učiteljske školi je pul njih bival neki Sikoćan z Kirije, ki je umel povedat štorije od Kirac.