Vicićevi

Sad pridemo h Vicićeven. Uska kuća naslonjena na graski zid na tri podi, na saken jena kamara, a zada kamarica. Kuhinja je bila hićena vanka kontra Pelinon, a ž nje se prihajalo na jenu verandu, se va stakleh. Tu su živeli Staze (Anastas) Baćić, brat Arneštića i Valentina – Vicići, z ženun Pavicun i z decun: Karlo, Franjo, Elvira, Emanuel (Manko), Jeronim (Jerko), Marica (nisan sigur!!) i Ivanka. Kako ja pametin to vreme prej 60 let Karlo i Franjo su nekade po Hrvaskoj  vadili art kod za trgovinu, Manko je finil va Grade za učitelja, a Jerko za tišljara. Hćeri nisu imele arta, nisan sigur za Elviru da je umela šit.

Kako su živeli? Jako slabo. Otac Staze je bil dimnjačar po arte, ma kad bi prišal očistit dimnjak je više povedal nego ča je delal. Dimnjaki starinski su široki a nimaju “geschlossen Zielinder“ da budu zaprti kod moderni, da mu bude lagje delat.

Pavica je pak bila jako vredna za delo kod pećarica pul Franića Rudnara va peknjice. Ona je sigurno više doma prinašala nego njiji Staze z svojemi metlicami i škuvetami, a ljudi su govorili: “joh toj dece da ni Pavice“. O Noven lete je Staze raznašal po kućah kolendari na keh je pisalo: “Uvijek spreman Anastaz Baćić, vaš dimnjačar“, bila je i slika dimnjačara na krove kako čisti dimnjak. To se računalo da ti dnevi dimnjačar prinosi sreću za celo leto, kod ča se i danas reče kad trefiš dimnjačara. Ma je Staze štufeval ljudi z svojemi ćakulami, ken ni nikada bilo kraja, dali bi mu ki žmuj vina, čagod beči kod manću, misleć va sebe: hod ča prej ća! Na oca su bili štufni Manko, Jerko i Karlo, druga deca su bila na mater Pavicu, vredni, žvelti i za delo. Treba reć da je Manko bil jedan od najbojeh sokoli kad mu je za to bilo vreme, toliko je vežbal da je bil preveć razvijen. Bil je dobil prvo mesto, kod učitelj, Bočac, uz reku Vrbas, na pol puta od Banja Luki za Jajce. San bil pul njih, š njen je bila sestra Marica, prenoćil i šal dalje drugi dan za Jajce, hodeć 1933.leta, o vakanceh. To je samo bila škola, nijene druge kući okolo nje, a deca su prihajala z kuć, rashitaneh okolo po bregeh i dolinah.

Franjo je bil neko vreme prišal doma i oprl butigu va kuće na vrh Stražnice pod Forticun, kade je nekada bil butiger Ban Prasica – tako su ga zvali – brat Frani Banice. Franjo se bil kod šegrt rovinal, je zgubil jeno oko, ma je vavek bil za škercat. Ni mu jako šlo s tun butigun, pa ta njegova prova ni dugo durala, je zaprl i šal nekamo ća. Karlo je bil po Hrvaskoj, a finil je va Beograde kod poslovođa jene staklarije. Ni već živ.