Beličini

Spod Štrakotoveh su Beličini. Ma prej neg ča ću zapisat ki je va toj kuće živel, mora se još neš reć od Štrakotoveh. Tako su zvali samo nonota Ližija. Milana i njegoveh nisu nikada tako zvali, nego su rekli da su to Brozovićevi, al od Milana Brozovića. Povedala mi je kod otroku moja mat Mila da je va toj Štrakotovoj kuće bila škola va ku je i ona va svoje vreme hodila i tu finila školu. Još vavek čuvan i knjižicu ku je dobila kad je školu finila, a knjiga ima naslov ˝Genoveva˝.
Pul Beličineh je doma bila mat, ako se ne varan Marija, i otac Frane (Frane Stanić) ki je vavek s košen na hrte obahajal i delal grunat ki su imeli. Od hćeri je Milka bila oženjena za Aleksandra Roliha, krojača, ki je bil od nekuda s Kranjske, ma mu se to va govore ni moglo čut, posensega j´bil navadil po domaću. Druga hći, ne pametin njoj ime, je bila oženjena za nekega Celina i su živeli nekade va Bosnoj, bi reć morda va Jajce, al tamo nekade. Doma su bili sin Franjo i hći Smiljana, obadva učitelji, a Franjo je pokle bil finil za nastavnika i profesora. Vrnul se j´z prvega rata kod dobrovoljac va Dobrudže, aš je prej tega kod austrijski soldat bil zarobljen od Rus, pa je pokle bil va Dobrovoljačkoj divizije ka je formirana od našeh ljudi ki su kod zarobljenici bili va Rusije. Neč bi reć da ja kod dobrovoljac bil dobil i zemlju, nekade va Slavonije, kod ča su to i si ti dobrovoljci dobivali, ma nisan sigur. Mane je vadil va vežbaonice va prven i drugen razrede, pokle je šal studirat va Zagreb, pa kad je to finil se j´vrnul va Grad i mi je va građanskoj škole predaval zoologiju i botaniku, a kad san ja hodil učiteljsku školu, Franjo je bil profesor va Pakrace na učiteljskoj škole. Onda se j´već bil i oženil, već kod malo stareji, a s kuda mu j´bila žena, ne znan. Smiljana je delala kod učiteljica va Grade a ni se ženila. Obadvoje su bili mej prvemi sokoli va Grade: Franjo je bil najboji vežbač na ručah i bil je gušt gledat ča je se umel na toj sprave storit. Smiljana je pak bila prednjak za ženske, članice Sokola.
Franjo je mane na berme bil kumpar, negde 1924. al 1925. leta, aš je pak moj otac bil njemu kumpar i tako je trebalo prit i na me red da buden kumpar sinu Franjota – ma j´prišal drugi rat, se se j’zmešalo i ni se mogal držat takov red i užanca. Pametin da je obed na dan bermi pul Beličineh dural dve uri. Jako puno kako san ja to onda mislel, aš san bil navajan saki obrok brzo finit.
Treba reć da su ove kući, keh san spomenul do sada, imele lepe brajdi i pred vrati puno rožic, i za sen ten ča se nisu belile sako leto, je po lete okolo njih jako lepo zgledalo i dišelo.