Hrenićevi

Prva štiva kuć počinje s kućun va koj su živeli Hrenićevi: otac Jovanin, mat Marija, hći Ana i sini Ive i Dušan. Jovanin (Ivan Sinčić) je po arte bil tišljar. Mojoj matere je storil kasun z škabelinon va ken je mat stavila svoju dotu kad se j´oženila za mojga oca. Ta kasun čuvan i danaska aš je tako zjuštan i storen po arte kod da je z jenega kusa. Ni čudo: Jovanin je art navadil pul Jovanina Micinega – Tajčini, jako štimanega tišljara va Grade. Ja, ma je Jovanin pustil pokle rata art ća i, postal je općinski fanat. Ni već nosil na glave črnu rašketu, kod si artižani, nego ga se to vreme pametin z kanicun na glave, aš sad je već bil neč kod impjegat. Je i na ten posle bil jako vredan, vavek je nekamo potekoval noseć v rukah avizi al pozivi za delit ljuden po Grade i po Vanjšćine. Jovanin je kod fanat općinski saku nedeju za ranun mašun kljical pod Ložun: ča je i kakov ordin od općini, kad treba platit davki, kad će bit leva, ki ča prodava i kade i još čagod ča j´rabilo sen ljuden reć. Mat Marija i hćer Ana su doma delale grunat, čuvale kozu i jarići, a sin Ive i Dušan su obadva finili za učitelja.

Ni bilo lahko Jovaninu z njegovun plaćicun platit si troški za školovat sini, za sen ten ča je bilo neč prihoda i od grunta. Ive je bil učitelj negde po Slavonije, pa se j’tamo navadil pit i napijat, a to j˝užal storit i kad bi doma prišal o vakanceh, al za Božić. Takovega ga ni nijendna otela pa je do kraja ostal stari mladić. Dušan je bil pak drugačeji: preveć samo doma, nikamo vanka, nekako samuh i kod zapućen, najviše prošetat po cimitere pred sv. Jelenun. To je imelo svoju dobru stran: Dušan je jako dobro navadil govorit nemški, talijanski i franceski još kod školan, pa je bil kod nekakov ciceron furešton, ki bi prihajali z Opatije, al skuda druguda va Grad, i bi njin špjegaval ča bi ih interesalo po Grade, al pak na vište pred crekvun. Umel njin je povedet i kakovu štoriju od Kastavac za nasmet se. Ni on se ni oženil, ni kad je dobil službu, čekajuć na nju dve leta.