Kuća Rikota Šundrića Ritini

Od Beličineh dalje po kale pride kuća va koj je bival moj barba, Riko Šundrić (Hinko Jelušić), kega su Grajani još zvali i Ritina aš je bil fanj debel, učitelj ki je delal na Delavskoj škole. Žene mu ne pametin ime. Imel je hćeri: Milu, ka je doma delala a ni bila niš finila i Olgu i Mariju, obedve učiteljice ke su doma, va Grade, finile školu. Puno su obadve čekale dokle su dobile službu. Negde, morda 1934. leta, su se si skupa preselili va Zagreb. Bin tel još neš reć: to su mi bile kujini ma nisu nikada s manun ni besedi progovorile, su se zgleda bale oca, al pak materi ka j´bila z Lanišć. Riko je govoril z mojen ocen, mu je bil kunjado, ma z mojun materun nikad ni besedu, a bila mu je sestra. Koliko san ja mogal zvedet to je bilo od vremena kad je moj otac oženil moju mater 1906. leta pa su se neč poprehtali okol doti ku je moja mat iskala od brata Dolfota za svo delo ko je š njen skupa storila va oštarije pul Šundrićeveh, zapravo svoj del od storenega posla v oštarije od vremena kad su njin umrli otac i mat. Ča j’va sen ten imel barba Riko i danas ne znan i ne rabi mi znat.