Kunčarovi

Na kraje ove štivi kuć pridu Kunčarovi. Mat Kunčarova, tako su je i zvali, je jako debelo govorila i po ten ju je bilo z duga poznat. Otac je bil prišal za zeta od Božinić, pa su ga po njegoven sele i zvali, a po arte je bil krojač. Bi ki pital: “Ki ti je storil robu?” a oni bi odgovorili: “Božinić krojač” , nikada se ni reklo krojač Kunčara. A sini su zvali po matere Kunčari: Zvonimir, Stanko i Ugo i hćer Stanka Kunčarova. Ugo je navadil art pul oca i š njen je delal. Zvonimir i Stanko su finili za učitelji 1920. leta va Grade. Kade j´Zvonimir služboval ne znan, ma je Stanko pokle finil više školi za kanat i muziku pak je dosta let bil na učiteljskoj škole va Hercegnoven nastavnik. A kad je 1930. leta šal va penžijon Tone Rišlavi, ki je va Grade vadil muziku i kanat va učiteljskoj škole, škola je bila leto dan zaprta i su tega leta ponovno oprli, prišal je Stanko doma delat svoje delo i tu je ostal do drugega zapiranja ove školi 1936. leta pa je bil premešćen va Osijek, opet na učiteljsku školu. Mane je Stanko jako ostal va pamete aš se ni pritendil kot drugi, s nami domaćemi školani je bil vavek po domaću, rado smo š njen ćakulali i nastojali smo ča boje znat ono, ča nas je vadil, posebe pak kad je bilo nastupit va zbore al va orkestre. Bil je dirigent i va sokolsken zbore va ken smo i mi, školani kantali. Zbor i orkestar od školi nastupal je na Sušake i na Trsate kad su bile neke proslavi. Hći Stanka je bila z materun doma. Okol nje se j´počel vrtet poštar Kordunaš, ki je bil prišal va Grad kad su Arneštić i Valentin šli va penžijon, skupa su tancevali, zgleda da se je Stanka za njega i oženila, nisan sigur aš san već bil ća.
Zvonimir je bil oženjen, ma Stanko je vavek, koliko ja pametin, bil mladić, za sen ten ča j´rad ćakulal z Valerijun Pizinovun i su skupa hodili kupat na Orbanov pesak. San bil čul da se je va Osjeke bil oženil s tamo nekun. Bil san već va službe ma Ugo je još vavek bil mladić, fanjski i dobar artižan, ma ni bil oženjen.