Sankovićevi

Kontra Beličinen pride kuća va koj su živeli Sankovićevi. Davorin Sanković je prišal z svojun ženun Maricun i z sini Milovanon i Dušanon z sela Dane va Istroj, od kuda je bil po rode. Od kega je ovu kuću kupil al morda redital, ne znan. Marica je bila od Štrkoveh, sestra Tončića Štrka, oca Vojmiru i Velimiru, a kujina mojoj matere, aš su moja nona Marija Šundrićeva i Nadala Štrkova, nona Vojmirova bile sestri. Davorin je z Maricun računal da te tako lepo proživet do smrti ovde va Grade, a da te ih sini pričuvat, kad njin je već šlo za rukun pobeć spod Italije i prit va Grad kade se j’slobodneje živelo. Si su oni prišli va Grad vaje negde za oslobojenjen kada se tako još moglo nekako lagje pasat preko novega kunfina. Pametin da su prišli z vozon na dva konja na ken su pripejali ča su imeli, a pokle su voz i konji morali prodat, ni njin to već rabilo.
Ja, ma stareji su jeno oteli, a drugačje se j´dogodilo. Prvi mu je obolel mlaji sin Dušan, ni dugo bil bolan i je naglo umrl. Stareji su računali da j´ostal Milovan, ki će ih prigledat, pa su ga dali vadit art pul Zvanića Jurjeničinega za laterničara. Milovan je art izučil ma se i on razbolel od jetiki, za ku va ono vreme ni bilo jako leka. Ni mogal delat, posejeval je s nami, neč mlajemi od njega, po Fortice, je pljuval va špudaćeru ku j´va žepe nosil, suho je kašljeval i jenega mladega leta je i on šal va sv. Luciju zavavek. Ostali su doma Davorin i Marica kod dva prsta, sami i već ostareli. Davorin bi i šal kamo vanka po nedeje, kako je užal reć da gre ˝pul Pidreta˝ a to će reć Pidriću Rubešan v oštariju, ma Marica je slabo hodila vanka, ni ni h nan prihajala svojoj kujine, mojoj matere, kad smo bivali pul Savetoveh, a to j’kuća do kući.
Kad je moja mat umrla o mladen lete 1934. leta nismo oteli ostat sami va veloj kuće Nazorovoj moj otac i ja, a on je već moral poć va penžijon, pa smo se preselili Sankovićeven na pod, kade je bilo boje va dveh manjeh kamarah i jenoj kuhinjice bivat, dokle nisan moral poć služit vojsku va oktobre tega leta, a otac je ostal sam. Kad san finil z soldačijun i prišal doma otac je već se bil uredil za po drugi put se oženit za dovicu Francika Slocara pul Belić. To leto 1935. leta smo se preselili Belićen, san čekal službu do marča 1936. leta kad san moral poć, s trbuhon za kruhon, od domi ća.