Savetovi

San već rekal da je prva kuća do Sankovićeveh Savetovi. Tako su dobili ime po neken Ksavere Muniće ki je nekada, pasanega stoletja bil puno let glavar na općine. Kod glavar je ta Ksaver moral imet cilindar kad bi šal kamo va vižitu h većen šaržan od njega, pa kad je to doma prnesal su ga pitali doma ča će s ten, to se va Grade ne nosi, a on je rekal: Stavite va njega fažol!
Tu su kuću davali pod fit aš je jena od Savetoveh bila oženjena za žandarma, ki j´moral poć kamo ga pošalju, pa nisu živeli va Grade. Va toj smo kuće bivali 1929. i 1930. leta, a tu se mojoj matere jako pijažalo aš su nutre dole i gore dve sali a z gornje se gre na skod i cela je kuća veći del dneva pod suncen. Mojoj matere je trnula leva noga pa je morala više hodit, leg sedet al stat. Bil njoj je duhtor Dabović rekal da tu nogu i sunča. Jezus, Marija, to je onda bilo sramota ma se j´neč moralo storit. Po lete je mat otprla portijeri na skode pul Savetoveh, pa j´nutre na sale sedela i sunčala tu bolnu nogu. Skod je bil pun rožic pa se z vani ni moglo niš videt.