Štrakotovi

Kuća Štrakotoveh je na kraj ove štivi. Va njoj su živeli: Ližijo Štrakotov (Vjekoslav Vlah) Milan Brozović i žena mu Štefanija i š njimi dva sina Milivoj i Danilo. Ližija su si va kuće zvali nono, a kemu je i po ken bil nono ne znan. Je to bil uredan i vavek vesel starac z velun bradun na dva špikja. Ni bil žvergalo ni štufan, ni se lemental ni jadil, a ne pametin da je ki put ča brontulal al pak zazijal kod ča užaju stareji ljudi. Nas dečinu je imel jako rad. Kad nas je trefil bi sakega potehtal al pogladil po glave pa bi rekal: Baš si ti jena lazanja! a nan se to jako pijažalo pa smo ga saki od nas računali kod da je naš nono. On je rad šnjofal tabak kega je čuval va jenoj lepoj škatulice va žepe od kamižolina. Ta prah od tabaka bi zel z dvemi prsti, stavil to pod nos, bi šmrknul forca na jenu i drugu stran nosa, a onda bi z gušton kihnul – to mu je bil veli gušt.
Milan je ženu zval Štefi, a Štefanija je sini zvala Milo i Dano. Mat Štefanija je bila z Trsta ma je jako dobro navadila po domaću, baš kad ne bi znala neku našu novu besedu bi pitala, a Milan bi njoj špjegal ča j´to po talijanski, aš se ta zajik najviše govoril va Trste kad je Milan tamo študiral. Ni rada pohajala po drugeh kućah, ma njoj je zato Francika Karlotova, ka njin je nosila vodu va brente, prinašala se novitadi z Grada. Štefanija je bila jako prijazna. I danas pametin kako je z gušton umela ponudit bićerin domaće rakiji kad bin, kod mladić i kumpanj Milivoju, prišal čestitat Novo leto, a i kad smo još bili školani vavek je imela neč za ponudit kad se h njin va kuću prišlo. Umela je jako lepo štikat pa je njijo delo bandera ku je štikala za društvo ˝Istarska vila˝.
Milan je bil škultor, umel je slikat i razumel se je va sakakovi dišenji za nekoliko arti. Delal je kod nastavnik na Delavskoj škole i njemu treba zahvalit ča je va to vreme va Kastavšćine bilo se više artižani, ki nisu znali samo lepo i dobro delat svoj art, nego su pul Milana navadili delat po dišanjah, napred zračunat kakovega materijala i koliko treba i koliko će neki posal se skupa kuštat. Milan je prezimal i drugo delo zvan dela va škole: Ploča pod Forticun i pul Baštijani kod i tombi na cimitere su njegovo delo. Pored tega Milan je vavek bil glavni za storit dekor ki j´rabil za predstavi na Brde i kašneje va Narodnen dome, neč i va salone pul Betota. Pametin da je za operu: Kovačev študent, ku su kantali na slovensken zajike, na Brde bila storena na pozornice prava kovačija. Va Betotoven salone je bila zabava na koj su kantali Žablju svadbu, opet na slovensken, a Milan je zmislel dekoraciju: je zaprl celu pozornicu široken platnon na ken je bila nacrtana lokva, a zad ten su čepeli si ki su kantali va zbore pa se samo čul kanat a zbor se ni videl. To se jako zapijažalo sen ki su poslušali. Na jenen koncerte na Crekvine je Milan zmislel ovakovu senzaciju: su zaprli s kulisami jenu kapelu na zide i pustili samo jena vrata, koliko more jedan čovek pasat, i na njih stavili koltrinu. Na kulisah je bil veli plakat na ken je pisalo: Nutre je šinjorina Virđinija va banje! Ulaz 1 dinar. Ljudi su se rivali za poć nutra, plaćali po dinar, ma saki ki bi prišal vanka ni onen vane tel niš reć, ča j´to nutre, se j´samo smel i bi se brzo zgubil. A ča j´to bilo nutre: jedan veli lavaman pun vodi a po vode je plaval cigar ki se j´onda zval virjinija. To su bili cigari ken je na kraj, ki se stavi v usta, bila stavljena jena slamica za lagje potezat dim kad se puši.
Milan je rad po nedeje boćeval na Crekvine z drugemi Grajani. Bi zavrnul rukavi i ostal va kamižoline, ma velu, črnu šijarpicu, vezanu na fjok, nikad ni moleval. Po toj šijarpice se j´mogal z duga poznat. Rad je zbijal, ma mu ni vavek šlo. Bi se pojidal, bi puhal i pljuval, ma ni nikad klel, kod ča j´bila užanca kad ne gre boćat ni zbit.
Njegovo delo storit dekor za predstavi je kašneje prezel sin Milivoj, ma bi Milan vavek prišal videt je to dobro storeno al neč fali, pa bi to sinu za večeru doma špjegal i navadil ga ča još treba popravit. Milivoj je frajal Miru (Kazimiru Matijević), Kiricu z Novega, ka je s nami skupa hodila va školu, pa su se kašneje i oženili. Milivoj je služil kod učitelj po Bodulije.
Mlaji sin Danilo je bil već mladićac kad san ja moral poć od domi ća.