Tinčevi

Prva kuća pod Žudikun je nasame i ima manji vrt. To su Tinčevi. Tu je živel Riko Tinčev (Emerik Stipković) z ženun Marijun i dosta dece. Riko je let i let na općine bil kaser, pa su ga ljudi po ten ča j´delal, više zvali Riko Kaser. Pametin kad je već bil va penžijone: rad bi stal po lepen vremene pred Volticun i bi gledal zdolun. Je bil već va leteh ma ni nikad sel na zidac pod Ćulićevun kućun, vavek se j´držal drito i korajo. Na glave rašketa, na nose cviker, okol pasa vela, široka, črna faša, ka mu j´držala trbuh, a na koj se videla kadena od uri, a za uru je bil storen mići žep va toj faše, v ruke baštoncin. I tako ku uru prej polna postat, počekat da v Reke shiti kanul za javit polne, zjuštat uru i poć doma obedvat.

Je imel veleh dišturbi dokle su mu va novoj države, SHS, regulali penžijon, ni se onda jako skrbelo ima Riko i njegova familija ča jist, pa se na penžijon puno čekalo. Kad je to bilo finjeno je moral sam poć va Beograd prijet se zaostalo beči za nekoliko let. Si ti šoldi su mu splatili va munide od 25 par, spaketano va vrećicah pa je moral zet fakina s karetun i tu munidu prepejat va neku banku, kade su mu munidu promenili za hartu.

Dece je va kuće bilo dosta. Milka je bila oženjena za Tončića Štrkovega, mat Vojmiru i Velimiru. Po arte je bila šilica i cel svoj život ni spušćala iglu z ruki. Marija i Stanka su ostale doma neoženjene, a Zlatica je bila šla nekamo ća. San bil mići ma pametin da je h nan prihajal Rikotu sin Silvan, a moj otac mu j´daval knjigi za čitat. Ta Silvan je negde prveh let za raton umrl. Franjo je hodil va pripravnicu za poć pokle za učitelja, ma ni to storil. Je raji sopal va violin, a jako je lepo umel sost, i tako je postal najboji i najpoznateji violinist va Grade. Kad je prišla moda za “jazband” je složil svoj orkestar. On sam je sopal va napošni violin, ki ni imel škatulu za rezonancu nego neč kod membranu na gramofone, pa je takov violin bilo jako čut, bil je tu tambur i triangul, dve kitari, trumbeta i vela novita – saksofon. Kad se to se skupa složilo je bilo jako lepo čut. Sopli su na tanceh, ma najviše po Zamete i pul Srdoč. Pokle se j´bil Franjo nekamo zgubil va Hrvasku. Doma je ostal Dušan, ki ni imel nikakov art. Je delal neko vreme va porte na Sušake kod manaval, a pokle j´šal va Zagreb pa su govorili da je tamo bil graski pulicaj.